Calpurnia ten case doce anos, é a única rapaza de sete
irmáns e vive en Caldwell (Texas). Durante o caloroso verán de 1899, case no
seguinte século, Calpurnia comeza a facerse preguntas sobre o seu entorno, a
familia, o medio natural… Curiosa e perspicaz, comprende que as súas preguntas
non serán respondidas nin polos seus irmáns nin pola súa nai, obsesionada coa
calceta e coas labores dunha “futura señorita”. Cando Calpurnia supera o gran
temor que lle provoca o seu avó, e se atreve a entrar no seu laboratorio e
preguntarlle sobre as súas dúbidas, pasará a formar parte dun mundo
extraordinario e completamente novo para ela. Pero a Texas de principios de
século aínda non concibe que a ciencia sexa para unha rapaza, polo que deberá
loitar contra receitas de cociña, clases de piano… para seguir fiel a si mesma.
A través das experiencias de Calpurnia, o lector
embárcase nunha historia emocionante na que as aventuras e os descubrimentos
son os protagonistas. A chegada do teléfono ao pobo, os amoríos dos seus irmáns
ou descubrimento dunha nova especie vexetal son moitas das vivencias que se plasman
nesta novela de Kelly.
O libro gustoume pola maneira de pensar de Callie Vee,
sempre adiantada ao seu tempo e intentando enfrontarse aos ideais machistas
daquela época. E que acaso só por ser muller non podía facer realidade os seus
soños? Só o seu avó era capaz de comprendela, nin tan sequera a súa familia a
apoiaba. Ademais, tamén me cautivou a maneira de expresar estes datos por parte
da escritora.
Recoméndolle o libro a calquera persoa curiosa, á que
lle guste investigar, explorar, aprender, descubrir cousas novas… xa que se
verá moi identificada coa protagonista.
Sen comentarios
Publicar un comentario