Marcas de nacemento

Comentario de Cristina Costela Seara


Marcas de nacemento
Nancy Huston
Rinoceronte

Este libro encantoume. É unha novela de destinos xa escritos, o destino e a sorte de cada persoa están determinados por un lunar.

Nancy Houston narra desde a perspectiva de catro nenos de seis anos, e estes non só están unidos por parentesco senón que as catro historias están enmarcadas en épocas de guerra. A través destes relatos o lector accede aos recordos persoais que forman parte da historia familiar ata descubrir o segredo que os marcou: a guerra.

Ese pasado que tanto lles pesa aos protagonistas reflíctese mediante unha marca de nacemento, un lunar que todos eles comparten e se transmite de xeración en xeración en distintos lugares do corpo como metáfora de como o pasado e a historia se transmiten ao longo dos anos a pesar de ser un pasado que só coñece o afectado por el.

O que me pareceu máis interesante do libro é o tema das guerras, xa que actualmente tamén hai conflitos deste tipo.

Unha historia emocionante, brillante... encantoume. Pareceume un pouco lento na súa parte central, mais é necesario para “unir” toda a historia que só se entende ao chegar ao final.

Penso que este libro é unha denuncia, que ao mesmo tempo relata acontecementos que probablemente marcaron a vida de moitos homes e mulleres.

Un libro que me ten en tensión e intriga durante toda a historia. E a necesidade de querer saber máis, de chegar ao fondo da marca que todos comparten fai que as páxinas voen.