A metamorfose

Comentario de Sonia Troitiño Loureiro


A metamorfose
Franz Kafka
Sotelo Blanco

A metamorfose pareceume o libro máis peculiar que lin na miña vida. Relata a historia dun home que esperta convertido nun escaravello. Pouco a pouco vai modificando por completo o seu corpo ata quedar mesmo sen voz. A súa familia, ante este acontecemento, non pode dar crédito, pero conseguen  acostumarse co paso do tempo ata que deciden que deben acabar con el xa que resulta verdadeiramente un estorbo. Finalmente, o escaravello acaba morrendo por si mesmo.

O argumento que aquí se nos relata resultoume a cousa máis disparatada e inverosímil que vin nun libro. Cando comecei a lectura impresionoume bastante, sobre todo a forma de actuar do protagonista, que se vía indiferente ante a transformación que estaba a sufrir. Pero o certo é, que a medida que o relato avanzaba, cada vez vía menos estraño o feito de estar lendo algo no que unha persoa se converte nun becho dun día para outro. Ademais, aínda que non sei moi ben o porqué, debo dicir que a historia me gustou moito e me chegou a conmover en certos momentos, como cando o protagonista era menosprezado ou sufría malos tratos polo simple feito de non ser o mesmo. Había momentos nos que a súa familia apoiaba a idea de que a  era imposible que realmente detrás dese corpo estivese un home.

Con todo, debo dicir que o final non foi o que esperaba. Esperaba que todo volvese á normalidade e que o escaravello se volvese converter nun home. Quizais pensaba isto porque era incapaz de crer na idea de que esa historia puidese acabar dese xeito, co home no corpo dun escaravello, algo que na vida normal resultaría totalmente incoherente. Pero aínda que o final da miña mente non se correspondeu co verdadeiro, direi que non me desagradou. A lectura é sinxela aínda que poida ser dificil de comprender debido á rareza dos feitos. En ocasións podía parecer algo monótona xa que o espazo mantense igual en todo momento e a historia non presenta acontecementos impactantes ou inesperados. Asemade, pareceume un libro entretido á par de interesante. Aínda que ao principio poida parecer demasiado ficticio ou fantasioso, o autor consegue que a propia historia pareza do máis natural a pesar dos feitos que se nos relatan.

Para rematar, dicir que recomendo este libro a todos aqueles que lles guste moito, moito ler xa que non o considero un libro que lle vaia a gustar a todo o mundo pola súa visible peculiaridade. Aínda así, para min esta peculiaridade e o feito de que rompa totalmente cos estereotipos, é o que o fai realmente interesante.