Berlín

Comentario de Sonia Troitiño Loureiro

Berlín
María Lado

Berlín é un libro de poemas de amor e é o nome do protagonista da obra que vive nun amor imaxinado, creado. Hai un "eu poético" que escribe para Berlín e desta forma establécese unha relación entre o poeta e a cidade. Conta a historia dunha moza que, a falta de alguén que a queira, decide inventarse un amante imaxinario. Este amor imaxinario é de Compostela e  no seu único encontro condúcea pola cidade que aparece representada coma o escenario perfecto para vivir unha historia de amor. Todos e cada un dos poemas están relacionados entre si, e xuntos forman unha fermosa historia. Este foi un libro que, a verdade, me gustou moito. Non tiven moitas oportunidades de ler libros de poemas que parezan ser un só que relata unha historia, pero foi unha boa experiencia. Nel, María Lado fai unha viaxe pola cidade de Santiago dunha maneira diferente, dálle un novo significado e cárgaa de novos símbolos, distintos aos que poderiamos atopar en calquera guía. É un gran poema cargado de sensibilidade e tenrura que consegue emocionar ao lector. Presenta expresións que, ao meu parecer, son impresionantes. De entre elas, quero destacar unha:

ás veces

para non sentirse triste, meu pequeno

hai que crer que as follas das camelias

bican os vidros dos autobuses.

e que despois das vías e do tren

sempre nos agardamos nós.

Nalgúns casos foime algo complexa a súa comprensión, pero na maioría das veces, presentábase de forma sinxela e entretida. Algo que me chamou a atención foi o feito de que autora se decidira por escribir o título deste libro,"berlín", con letras minúsculas, que é algo que a converte en única e especial. Como así o fai o feito de engadir, ao remate do libro, unha serie de agradecementos que ela recolle co título de "agradecida". Ademais, encántanme as continuas referencias que fai ao mar que fai que me sinta máis identificada co poema. De cada un dos seus versos podes aprender algo novo e en ocasións coñecela un chisquiño máis. 

Para rematar, recomendo este libro a todos aqueles amantes da poesía que desexan pasar un bo tempo da man dun libro.