Os saltimbanquis no paraíso

Comentario de Isidro Gil Pallares


Os saltimbanquis no paraíso
Xelís de Toro
Sotelo Blanco

Esta novela que comeza en Londres e remata en Galicia xogará coas túas ideas e farate levalas por camiños que brusca e repentinamente cambiarán de dirección.

Vicente, o personaxe principal desta novela, experimenta  un “asasinato”, vive habitualmente de ocupa, é substituído no que antes fora a súa vida, rouba, foxe, coida, sofre e experimenta o amor.

Cando te poñas a lela non te imaxines demasiado o que sucederá, xa que se non, pensarás que o autor se está a rir de ti. Isto é debido á gran cantidade de saltos no tempo, no espazo (dun lugar para outro, de vez en cando aparentemente sen moito sentido) e na maneira de pensar das personaxes xa que segundo vai transcorrendo a historia cambian a súa maneira de veren a historia. Sobre todo Vicente, que contra o final comeza a sufrir unha especie de metamorfose.

Anímote a que te unas a esta compañía de títeres e malabaristas e que emprendas unha gran aventura, que é tal que cruzarás varias veces o océano cruzando continente. Quedándote ao final, como non, na tranquila, acolledora e fermosa Galicia (como os propios personaxes a describen).