Unha rosa é unha rosa

Comentario de David Cabaleiro


Unha rosa é unha rosa         
Suso de Toro
Xerais

Que ocorre cando se mestura unha vella rica e vingativa, dous sobriños ansiosos de cartos, unha rapaza fiel a Deus, dous cuñados moi compenetrados, un neno mimado e un detective de televisión? O resultado é Unha rosa é unha rosa, unha comedia de medo, ironía e moitas sorpresas.

Ao ser a primeira obra dramática que lía, non estaba moi seguro de que me fose gustar. Pero ollando soamente as tres primeiras páxinas, e coñecendo como eran Pololo, Adela e as demais personaxes, souben que este libro estaba feito para min.

Pareceume moi enxeñosa a trama da obra: unha familia busca apoderarse da herdanza da súa tía Rosa acabando coa vida dos seus opoñentes, pero a pesar da súa desconfianza entre eles, acaban traizoados pola persoa que menos esperaban. Ademais, está escrita con moito coidado, procurando a sorpresa e, sobre todo, a risa do lector. Podo afirmar sen medo a equivocarme que Unha rosa é unha rosa é unha gran obra dramática, chea de picardía, retranca, comedia, fantasía, acción… e traxedia como guinda do pastel. A partir de agora, buscarei máis tempo libre para disfrutar deste xénero e de toda a maxia que nel se garda.

Quero recomendarlle este libro especialmente a todas as persoas que precisen esquecerse por un momento do mundo real e botar unhas cantas gargalladas pois, sen dúbida ningunha, atoparán neste libro o compañeiro perfecto.