Titoán

Comentario de Raquel García



Titoán
Inacio Vilariño
Demo editorial

Grazas a cómics coma "Titoán" podemos achegarnos á vida de Castelao dunha maneira máis divertida e interesante á que non estamos acostumados.

É un libro fácil de ler, o único que pode facer que te perdas un pouco é o salto do tempo que introduce case ao principio xa que se non te fixas podes pensar que ocorre todo no mesmo tempo. Ao ser un cómic e ter moitos pequenos debuxos tamén me foi máis facil de ler xa que me distraía máis mirando para eles.

O libro fálanos do paso do tempo na vida de Castelao, da ida da mocidade e da chegada da madurez. Dinos tamén que el se meteu médico pola vontade de seu pai pero que o seu punto débil sempre sería o debuxo e, entre iso, a caricatura.

Titoán é o home ao que representa o cabezudo que lle encargan facer a Castelao para as festas de Rianxo, inspirouse en Titoán por ser o máis feo de toda a vila. Ao principio ao retratado non lle gusta nada pero logo termina quedando encantado xa que o cabezudo e máis el son idénticos, tanto que ata lle chama "o meu irmanciño".

O paso do tempo na vida de Castelao refléxase en que na súa mocidade está solteiro e logo casa e posteriormente xa ten un fillo. Tamén se ve reflexado en como o cabezudo un día xa deixa de ser paseado polas vilas de Rianxo debido aos estragos causados nel, polo sancristán e polo tempo, e as festas cada vez van a menos, e por último a Titoán tamén lle pasan factura os anos e derivado dunha enfermidade queda tolleito.

Este é un bo libro para aprender cousas da vida dun personaxe histórico de maneira entretida!